Harri Keyn: "Daha 8 və ya 9 ilimi ən yüksək səviyyədə keçirəcəyimə ümid edirəm"

"Bavariya"nın hücumçusu Harri Keyn yaxın vaxtlarda İngiltərə milli komandasını tərk etmək fikrində olmadığını bildirib.

"Operativ Media" xəbər verir ki, bu haqda ingilis futbolçu "Daily Maily" nəşrinə müsahibəsi zamanı danışıb.

“İngiltərədə oynamaqdan həmişə fəxr etmişəm və təqaüdə çıxmaq haqqında düşünmək belə mənim üçün çox çətin olardı. Mən həmişə irəliləməyə və mümkün olanın sərhədlərini sınaqdan keçirməyə çalışacaq biriyəm. Yəqin ki, artıq seçilməyənə qədər davam edəcəyəm və sonra bunu qəbul edəcəyəm. İngiltərədə oynamağın hər dəqiqəsindən həzz alıram və bunun tezliklə bitməsini istəmirəm" 

Futbolçu qeyd edib ki, karyerasının yalnız yarısını başa vurub.

“30 yaşınız tamam olanda insanlar bunun son olduğunu düşünməyə başlayırlar. Amma mən buna belə baxıram: karyeramın ikinci yarısına yenicə qədəm qoyuram. Son 9-10 ili ən yüksək səviyyədə keçirmişəm. Ümid edirəm ki, daha səkkiz-doqquz il də eyni səviyyədə olacaq”.

Keyn bu yay "Tottenhem"dən "Bavariya"ya keçib. Transfer məbləği 100 milyon avro təşkil edib. 30 yaşlı futbolçu Bundesliqada 7 oyuna çıxıb, 8 qol vurub, 4 məhsuldar ötürmə edib.

Hücumçu İngiltərə millisində 86 oyun keçirib və 59 qola imza atıb.