Makronun yeritdiyi daxili və xarici siyasət həm Fransada, həm də beynəlxalq aləmdə mənfi qarşılanır - ŞƏRH
"Fransada siyasi böhran yaşanmaqdadır. Siyasi böhranın əsas səbəbi Fransanın Baş naziri Mişel Barnye Fransa konstitusiyasının 49.3 maddəsinə istinad edərək sosial sığorta ilə bağlı məsələləri parlamentdə müzakirə etmədən təsdiqləməsidir. Parlamentdə sol və sağ partiyalar birləşərək, parlamentin səlahiyyətlərinin azaldılması və baş nazirin səlahiyyətlərindən sui-istifadə kimi qiymətləndirmişlər. Nəticədə hökumət əleyhinə 331 deputat səs verib. Söhbət parlamentin aşağı palatasından gedir".
Bu sözləri “Operativ Media”ya Milli Məclisin deputatı Elman Nəsirov deyib.
Deputat bildirib ki, 1962-ci ildən sonra ilk dəfə Fransada hökumətə etimadsızlıq və hökumətin istefası baş verib: "Prezident Makron da bu qərarı təsdiqləməli oldu. Çünki parlamentdə onun partiyası çoxluq təşkil etmir. Əgər Makronun partiyası çoxluq təşkil etsə idi, o əks mövqedən də dura bilərdi.
Fransada Mişel Barnye hökuməti ən az hakimiyyətdə qalan hökumət kimi tarixə düşdü. Cəmisi 90 gün hakimiyyətdə qaldı. Eyni zamanda Milli Cəbhə partiyasının rəhbəri Marine Le Pen bildirib ki, islahatlar təkcə parlamentin istefası ilə məhdudlaşmamalıdır, eyni zamanda Emmanuel Makron da istefa verməlidir. 2025-ci ildə növbədənkənar prezident seçkiləri keçirilməlidir. 2027-ci ili gözləmək lazım deyil. Fransadakı müxalifətin fikrincə, Emmanuel Makronun 7 illik fəaliyyəti indiki siyasi böhrana gətirib çıxarıb. Bütün məsuliyyət Makronun üzərinə düşür. İstisna deyil ki, 2027-ci ili gözləmədən, 2025-ci ildən əvvəl kənar prezident seçkiləri keçirilə bilər. Və bununlada Emmanuel Makron tarixin arxivinə göndərilsin.
Emmanuel Makron da öz ekdiklərini biçir. Onun yeritdiyi daxili və xarici siyasət həm ölkəsində, həm də beynəlxalq aləmdə mənfi qarşılanır. Xüsusilə də onun ada dövlətlərinə qarşı yeni müstəmləkəçilik siyasəti beynəlxalq aləmdə çox ciddi reaksiya doğurur. Azərbaycan Fransanın əzdiyi və tapdaladığı xalqların müdafiəsi kimi çıxış edir. Bu da bizim haqq və ədalətin yanında yer aldığımızı göstərir. Bu, bizim siyasətimizin mahiyyətindən irəli gələn hadisədir".
