Gürcü xalqı təxribatlara inanarsa, gələcəkdə ölkə böyük çətinliklərlə qaşılaşacaq - ŞƏRH

"Bu gün biz Gürcüstan, Ermənistan və bölgəmizdə baş verən hadisələrə Qərb-Rusiya qarşıdurmasının təzahürü kimi baxmalıyıq. Qərb ölkələri, Rusiyanın təsirini zəiflətmək məqsədilə, Gürcüstanda da Rusiyaya qarşı cəbhə açmaq istəyirlər. Eyni zamanda, bölgəmizdə öz mövqelərini gücləndirməyə çalışırlar. Bu siyasətin əsas səbəbi və məqsədi bölgəmizdə güclənmək və burada strateji üstünlük əldə etməkdir. Bu proses, təbii olaraq, bölgədə gərginliyə və qarşıdurmalara səbəb olur. Bunun səbəbi isə bir sıra Qərb ölkələrinin bölgəmizdə öz siyasi və iqtisadi maraqlarını təmin etməyə çalışmalarıdır". 

Bu sözləri “Operativ Media”ya Milli Məclisin deputatı Ceyhun Məmmədov deyib.

Depuatat bildirib ki, ona görə də, bu gün biz stabilləşməni görmürük: "Çünki bu qüvvələr mütləq şəkildə qarşılarına məqsəd qoyublar ki, Gürcüstanda çevrilişə nail ola bilsinlər. Bunun üçün də bütün güclərini səfərbər ediblər və vəziyyəti öz xeyirlərinə yönləndirməyə çalışırlar. Bu yanaşma ölkəmizin daxili siyasətinə müdaxilə etmək istəyən qüvvələrin strategiyasının bir hissəsidir. Biz davamlı olaraq qarşıdurmaları və problemləri açıq şəkildə görürük. Etirazlarda təqdim olunan, guya Gürcüstanın Qərbə inteqrasiya olmaq istədiyi fikirləri ciddi şəkildə təhlil etməliyik. Hakimiyyət isə öz növbəsində, bu ideyalara qarşı çıxaraq Rusiyaya yaxınlaşmağı seçib. Lakin, bu məlumatların heç bir real əsası yoxdur. Qeyd etdiyimiz kimi, bu fikri yayanlar yalnız öz dar maraqlarını təmin etməyə çalışırlar. Gürcü xalqı bunu bilməlidir və təxribatlara uymamalıdır.

Əgər bu təxribatlara Gürcü xalqı inanarsa, gələcəkdə Gürcüstanı böyük çətinliklər gözləyir. Bunu nəzərə alaraq, onlar öz ölkələrinin gələcəyini düşünərək, mövcud vəziyyəti diqqətlə qiymətləndirməlidirlər. Gürcü xalqı bu təhdidləri aşaraq, daha firavan və sabit bir gələcək qurmaq üçün diqqətli olmalı və öz milli maraqlarını qorumağa çalışmalıdır".