WP: ABŞ son 5 ayda İsrailə 100-dən çox silah satışını gizli şəkildə təsdiqləyib
2023-cü ilin oktyabrında Fələstin-İsrail münaqişəsinin kəskinləşməsi başlayandan bəri Amerika administrasiyası İsrailə 100-dən çox silah və sursat paketi göndərib.
"Operativ Media" xəbər verir ki, bu barədə "The Washington Post (WP)" məlumat yayıb.
Məlumata görə, ABŞ administrasiyasının rəsmiləri ABŞ Konqresinin üzvləri üçün qapalı brifinq zamanı tədarüklə bağlı məlumatları paylaşıblar. Oktyabr ayından etibarən belə paketlərin bir hissəsi kimi ABŞ İsrailə dəqiq bombalar, kiçik diametrli bombalar, bunker qırıcıları, atıcı silahlar və digər öldürücü silahlar ötürüb. ABŞ Dövlət Departamentinin yüksək vəzifəli nümayəndəsi nəşrlə söhbətində bu yolla yəhudi dövlətinə təhvil verilən bütün silahların ümumi sayını və dəyərini açıqlamaqdan imtina edib.
Bu günə qədər Vaşinqtonun İsrailə yalnız iki böyük silah satışı barədə ictimaiyyətə məlumat verilib. Bunlar 106,5 milyon dollar dəyərində 120 mm-lik tank mərmiləri və müvafiq avadanlıqlar və 147,5 milyon dollar dəyərində 155 mm-lik mərmilərdir ki, onların təhvil verilməsi dekabrda təsdiqlənib. Amerika administrasiyası silahların İsrailə dərhal təhvil verilməsini tələb edən fövqəladə halları əsas gətirərək, Konqresin təsdiqi olmadan tədarüklə bağlı qərarlar qəbul edib. Beləliklə, qanunvericilərin adi silah satışında olduğu kimi hərbi məhsulların satışını əngəlləmək imkanı yoxdur.
