Fransa Livanın şiə "Hizbullah" təşkilatının tərksilah olunmasına nəzarət prosesinə qoşula bilər və Livan ordusuna dəstək məqsədilə ölkədə beynəlxalq qüvvələrin yerləşdirilməsinə kömək etməyə hazırdır.

​Operativ Media xəbər verir ki, bu barədə Fransanın xarici işlər naziri Jan-Noel Barro "Ouest-France" qəzetinə müsahibəsində bəyan edib.

​Nazir qeyd edib ki, Livan və İsrail hökumətləri arasında əldə olunmuş razılaşma atəşkəsin uzunmüddətli təmini üçün tarixi imkanlar yaradır. Onun sözlərinə görə, Paris atəşkəs rejiminə riayət olunmasının monitorinqində və müqavilənin şərtlərinin, xüsusilə yerli ordu tərəfindən "Hizbullah"ın silahsızlaşdırılmasının yoxlanılmasında iştirak etmək niyyətindədir.

​Diplomat əlavə edib ki, bu cür əməliyyatların keçirilməsi mandatı ilin sonunda başa çatacaq BMT-nin Livandakı Müvəqqəti Qüvvələrinin (UNIFIL) səlahiyyətlərindən kənara çıxmağı tələb edir. Jan-Noel Barro rəsmi Beyrutdan müraciət daxil olacağı təqdirdə, ABŞ və başqa Avropa ölkələrinin, xüsusən İtaliyanın dəstəyi ilə Livan Silahlı Qüvvələrinə yardım göstərəcək beynəlxalq koalisiyanın formalaşdırılması üçün səyləri səfərbər etməyə hazır olduqlarını bildirib.

​Xatırladaq ki, iyunun 26-da Livan və İsrail Vaşinqtonda ABŞ-nin vasitəçiliyi ilə keçirilən beş mərhələli danışıqlardan sonra çərçivə sazişi imzalayıblar. Həmin sənədə əsasən, Livan ordusu bütün ölkə ərazisində suveren nəzarəti tədricən bərpa edəcək, qeyri-hökumət silahlı qruplaşmaları tərksilah olunacaq və onların hərbi infrastrukturu ləğv ediləcək. Bu addımlar İsrail qoşunlarının Cənubi Livandan çıxarılmasına şərait yaratmalıdır.

​Qeyd edək ki, Livandakı sülhməramlı missiya 1978-ci ildə İsrailin bu ölkəyə hərbi müdaxiləsindən sonra BMT Təhlükəsizlik Şurasının qətnaməsi ilə təsis edilib və mandatı hər altı aydan bir uzadılır. Hazırda UNIFIL-in tərkibində 47 dövlətdən təxminən 8,2 min hərbi qulluqçu xidmət edir, Rusiya sülhməramlıları isə bu missiyada yer almır.