"Bu maddələrlə işləyərkən fərdi qoruyucu vasitələrdən istifadə edilməli, preparatlar yalnız təlimata uyğun dozada tətbiq olunmalıdır. Əks halda zəhərlənmə, tənəffüs yollarının zədələnməsi, dəri və göz qıcıqlanmaları yarana bilər.

Pestisidlərin normadan artıq tətbiqi isə məhsulların üzərində qalıq miqdarının artmasına səbəb olur. Xüsusilə məhsul yığılmazdan əvvəl gözləmə müddətinə əməl olunmayanda bu kimyəvi qalıqlar meyvələrin üzərində qalır. Belə məhsulları davamlı yemək zamanla orqanizmi zəhərləyir və toksik maddələr bədəndə toplanır. Bunun ilkin əlamətləri baş ağrısı, ürəkbulanma, allergik reaksiyalar kimi özünü göstərir.

Uzun müddət yüksək pestisid qalığı olan meyvə və tərəvəzlərin qəbulu daha ciddi fəsadlara gətirib çıxara bilər. Elmi araşdırmalar göstərir ki, bədəndə pestisidlərin çoxalması müəyyən xərçəng növlərinin yaranma riskini artırır, sinir və hormonal sistemə, böyrəklərə, qaraciyərə və reproduktiv sağlamlığa ziyan vurur. Uşaqlar, yeniyetmələr, hamilə və süd verən qadınlar bu təsirlərə karşı daha həssasdırlar. Hamiləlik dövründə yüksək miqdarda pestisid təsiri dölün inkişafına mənfi təsir göstərə bilər. Bu barədə Ümumdünya Səhiyyə Təşkilatının hesabatlarında da xəbərdarlıqlar yer alır.

Eyni zamanda, BMT-nin Ərzaq və Kənd Təsərrüfatı Təşkilatı son onilliklərdə dünyada pestisid istifadəsinin artdığını bildirir. Bu isə təkcə qida təhlükəsizliyi baxımından deyil, həm də torpaq, su ehtiyatları və ətraf mühit üçün əlavə risklər yaradır. Digər vacib məqam isə məhsulların mövsümündən kənar yetişdirilməsi zamanı istifadə edilən kimyəvi maddələrdir ki, bunların da normadan artıq işlədilməsi əlavə təhlükələr doğurur.

Bu səbəbdən fermerlərin davamlı maarifləndirilməsi və laborator nəzarətin gücləndirilməsi xüsusi əhəmiyyət daşıyır. Xüsusilə kiçik təsərrüfatlarda və qeyri-rəsmi satış məntəqələrində nəzarətin zəif olması səbəbindən standartlara cavab verməyən məhsulların bazara çıxma riski daha yüksək olur".