Pakistan turizm sənayesi nümayəndələri üçün Azərbaycana tanışlıq səfəri təşkil olunub

Azərbaycan Turizm Bürosu tərəfindən Pakistanın 10 aparıcı turizm şirkətinin nümayəndələri üçün ölkəmizə tanışlıq səfəri təşkil olunub.

Bu barədə Operativ Media-ya Dövlət Turizm Agentliyindən bildirilib.

Tanışlıq səfərinin məqsədi iştirakçıları Azərbaycanın turizm potensialı, əsas turizm məhsulları və qonaqpərvərlik imkanları ilə yaxından tanış etmək olub. Səfər zamanı iştirakçılar Bakı, Şabran, Quba və Qusar rayonlarını ziyarət edərək ölkənin zəngin mədəni irsi, təbii turizm resursları və istirahət imkanları barədə məlumat əldə ediblər.

Proqram çərçivəsində iyunun 12-də B2B formatında şəbəkələşmə tədbiri təşkil olunub. Tədbirdə Pakistanı təmsil edən turizm şirkətlərinin nümayəndələri ilə Azərbaycanın turizm sənayesinin 50-yə yaxın şirkəti arasında görüşlər keçirilib.

Qeyd edək ki, 2025-ci il ərzində Pakistandan Azərbaycana səfər edənlərin sayı əvvəlki illə müqayisədə 13 faiz artaraq 91 043 nəfər təşkil edib. Hazırda “Azərbaycan Hava Yolları” QSC (AZAL) tərəfindən Bakı ilə Lahor və İslamabad şəhərləri arasında, eləcə də “Pakistan International Airlines” (PIA) və “Airblue” aviaşirkətləri tərəfindən Lahor-Bakı marşrutu üzrə birbaşa uçuşlar həyata keçirilir.