Yaponiya hərbi xərclərdə növbəti rekord həddə yaxınlaşır
2026-cı maliyyə ilində (1 aprel 2026-cı ildə başlayıb) Yaponiyanın müdafiə xərcləri ölkənin ÜDM-nin təxminən 1,9%-ni təşkil edəcək.
Operativ Media xəbər verir ki, bu haqda Yaponiya Müdafiə naziri Şinciro Koizumi jurnalistlərə açıqlamasında deyib.
Nazirin sözlərinə görə, müvafiq xərclər də daxil olmaqla, ümumi müdafiə büdcəsi təxminən 10,6 trilyon yen (66,7 milyard dollar) olacaq. Koizumi qeyd edib:
"ÜDM ilə nisbətdə bu, təxminən 1,9% təşkil edəcək".
O, müdafiə xərclərinin artırılmasının yeni milli təhlükəsizlik strategiyasının icrası çərçivəsində həyata keçirildiyini xatırladıb. Yaponiyanın müdafiə büdcəsi yen ifadəsində növbəti dəfə rekord həddə çatacaq.
Qeyd edək ki, 2025-ci ildə bu göstərici artıq ÜDM-nin 2%-nə çatmışdı, halbuki əvvəlcə bu səviyyəyə yalnız 2028-ci ilin baharına qədər nail olmaq planlaşdırılırdı. 2026-cı ildə ÜDM-ə olan faiz nisbətinin azalması, xüsusilə yenin dollar qarşısında kəskin ucuzlaşması ilə bağlıdır.
Yaponiya hökuməti 16 dekabr 2022-ci ildə yeni milli təhlükəsizlik strategiyasını təsdiqləyib. Sənəddə xüsusilə Yaponiyanın potensial rəqibin ərazisindəki hədəflərə əks-zərbələr endirmək hüququ qeyd olunur. Eyni zamanda vurğulanır ki, qabaqlayıcı zərbələrin endirilməsinə yol verilmir. Strategiya hərbi xərclərin 2027-ci ilə qədər NATO nümunəsində ÜDM-nin 2%-nə qədər artırılmasını nəzərdə tuturdu, lakin Baş nazir Sanae Takaiçi bu hədəfə vaxtından əvvəl nail olunacağına dair artıq söz verib. Cavab zərbəsi potensialını əldə etmək üçün Yaponiya hökuməti silahlanmada olan "Tip-12" raketlərinin mənzilini artırmağı, şəxsi hipersəs silahlarını hazırlamağı və ABŞ-ın "Tomahawk" qanadlı raketlərini almağı planlaşdırır. Takaiçi Baş nazir vəzifəsinə seçildikdən dərhal sonra dünyada və Yaponiya ətrafındakı regionda yaranmış gərgin təhlükəsizlik vəziyyətini əsas gətirərək, milli təhlükəsizlik strategiyası da daxil olmaqla, təhlükəsizlik sahəsindəki əsas sənədlərin yenidən nəzərdən keçirilməsi barədə göstəriş verib.
