Şəkidəki ağır yol qəzasında iki nəfər ölüb, biri polis əməkdaşıdır - YENİLƏNİB

Şəkidə baş verən ağır yol qəzasında iki nəfər ölüb, daha üç nəfər isə xəsarət alıb.

"Operativ Media" xəbər verir ki, qəza zamanı həyatını itirən "Opel" markalı minik avtomobilinin sürücüsü Ramin Abdullayev Zaqatala Rayon Polis Şöbəsinin əməkdaşıdır.

Qeyd edək ki, hadisə Yevlax-Zaqatala-Gürcüstan magistral yolunun Şəki rayonu Çayqaraqoyunlu kəndi ərazisindən keçən hissəsində qeydə alınıb. Belə ki, hərəkətdə olan Zaqatala rayonu, Mosul kənd sakini Ramin Abdullayevin idarə etdiyi “Opel” markalı minik avtomobili Həsən Ağahəsən oğlu Məhəmmədovun idarə etdiyi “Man” markalı yük maşınına çırpılıb.

Qəza zamanı müxtəlif dərəcəli ağır bədən xəsarətləri alan sürücü Ramin Abdullayev və avtomobildə olan bir nəfər qadın sərnişin hadisə yerində həyatını itiriblər. Qəzadan sonra avtomobildə sıxılmış vəziyyətdə qalan hər iki meyit FHN-nin Şəki rayon Dövlət Yanğından Mühafizə Hissəsinin xilasediciləri tərəfindən çıxarılaraq aidiyyəti üzrə hadisə yerinə çağırılmış həkim briqadasına təhvil verilib. Minik avtomobilində olan daha üç sərnişin isə müxtəlif dərəcəli bədən xəsarətləri alıblar. Yaralılar isə Yevlax Rayon Mərkəzi Xəstəxanasına yerləşdiriliblər.

Faktla bağlı Şəki rayon prokurorluğunda araşdırma aparılır.

16:13

Avqustun 11-də saat 12 radələrində Şəki rayonu ərazisində ölümlə nəticələnən yol-nəqliyyat hadisəsi baş verib. 

DİN-in Mətbuat Xidmətinin regional qrupundan "Operativ Media"ya verilən məlumata görə, “Opel” markalı avtomobil yük avtomobili ilə toqquşub.

Hadisə nəticəsində minik avtomobilinin sürücüsü Ramin Abdullayev və sənişini vəfat edib.

Araşdırma aparılır.