Xidmət rəisi: Son illər dünyada anomal təbiət hadisələrinin sayında artım müşahidə olunur

Son illər dünyada anomal təbiət hadisələrinin sayında artım müşahidə olunur. Şübhəsiz bu da dünyada baş verən iqlim dəyişikliyi ilə bağlıdır.

"Operativ Media" xəbər verir ki, bunu Milli Hidrometeorologiya Xidmətinin rəisi Nazim Mahmudov deyib. O bildirib ki, ölkəmizdə də belə anomal təbiət hadisələrinin sayı artıb:

Belə ki, son illər havanın temperaturunun normadan artıq olması, eyni zamanda yağıntıların miqdarında, sel və daşqınların sayında artım özünü daha çox biruzə verir. Son bir neçə gündür ki, ölkəmizdə iyul ayına xas olmayan qeyri-sabit hava şəraiti hökm sürür. Əksər bölgələrdə, xüsusən Daşkəsən-Gədəbəy, Qazax–Gəncə, Balakən-Şəki, Lənkəran-Astara bölgələrində intensiv yağış yağıb. Leysan xarakterli yağış nəticəsində ölkənin bir çox çaylarından sel keçib. Son iki gün ərzində yağan intensiv yağış nəticəsində Gəncəçayda suyun səviyyəsi artıb ki, bu da son illər ərzində maksimal göstəricidir”.

N.Mahmudov onu da qeyd edib ki, son dövrlərdə çaylarda baş verən sel hadisələrinin sayında əhəmiyyətli artım müşahidə olunur. Müqayisə üçün deyə bilərik ki, ötən ilin may, iyun və iyul ayları ərzində ümumi olaraq 87 sel hadisəsi qeydə alınmışdısa, bu ilin analoji ayları üzrə 102 sel hadisəsi baş verib. Son 50 ildə ən çox sel hadisəsi bu il qeydə alınıb.