SOCAR-la ABŞ-nin “Honeywell” şirkəti arasında Əməkdaşlıq Sazişi imzalanıb

Azərbaycan Dövlət Neft Şirkəti (SOCAR) ilə ABŞ-nin “Honeywell” şirkəti arasında regionun enerji sənayesinin avtomatlaşdırılması və enerji keçidinin inkişafı məqsədilə Əməkdaşlıq Sazişi imzalanıb.

"Operatuv Media" xəbər verir ki, SOCAR-ın məlumatına görə, sənədi SOCAR prezidenti Rövşən Nəcəf və “Honeywell”in baş icraçı direktoru Anant Maheşvari imzalayıblar.

Sənəd enerji sektorunun rəqəmsallaşdırılmasının dəstəklənməsi, emissiyaların azaldılması, təhlükəsizlik, innovativ həllər üzrə əməkdaşlığı nəzərdə tutur.

Tərəflər arasında keçirilən görüşdə uzunmüddətli və səmərəli əməkdaşlıqdan, bu xüsusda “Star” neft emalı zavodunun (NEZ) inşası, Heydər Əliyev adına neft emalı zavodunun modernləşdirilməsi layihələrində birgə fəaliyyətdən məmnunluq ifadə edilib.

Görüşdə sənayenin rəqəmsallaşdırılması, dayanıqlılıq, enerji keçidi, insan kapitalının inkişafı istiqamətləri üzrə əməkdaşlıq, həmçinin bərpaolunan enerjiyə həsr olunan beynəlxalq tədbirlərdə birgə iştirak imkanları nəzərdən keçirilib, qarşılıqlı maraq doğuran digər məsələlər ətrafında fikir mübadiləsi aparılıb.