Yəmənin Mülki Aviasiya və Meteorologiya Baş İdarəsi ölkədəki bütün hava limanlarının bağlanması barədə əvvəlki qərarını ləğv edərək onların tam iş rejimində fəaliyyət göstərdiyini bəyan edib.

​Operativ Media xəbər verir ki, qurumun yaydığı yeni bəyanatda Yəmənə və əks istiqamətə uçuşlar həyata keçirən bütün aviaşirkətlərə hava limanlarının tam istismara hazır olduğu bildirilib. İyulun 13-də verilən məhdudiyyət qərarını qüvvədən salan bu sənəd dərc olunduğu andan qüvvəyə minib.

​Bundan əvvəl Yəmən Müdafiə Nazirliyi paytaxt Sanadakı aeroportun uçuş-enmə zolağına zərbələr endirildiyini açıqlamışdı. Qeyd olunub ki, bu addım İrana məxsus təyyarənin enişinin qarşısını almaq məqsədilə atılıb. Nazirliyin məlumatına görə, "Ənsar Allah" hərəkatının üsyançı husiləri yerli aviasiyanın paytaxt aeroportundan istifadəsinə qadağa qoysalar da, İran təyyarəsinin ölkə ərazisinə daxil olmasına şərait yaradıblar.

​Öz növbəsində, husilər paytaxt hava limanına endirilən zərbələrə görə Səudiyyə Ərəbistanını ittiham ediblər. Husilərin formalaşdırdığı hökumətin Xarici İşlər Nazirliyi bu hücumu müharibə elanı kimi qiymətləndirib və gərginliyin azaldılması mərhələsinin başa çatdığını bəyan edib.