Birinci yarımildə sənaye zonalarında 21 sahibkarlıq subyekti rezident və qeyri-rezident kimi qeydiyyatdan keçib

Cari ilin I yarısında İqtisadi Zonaların İnkişafı Agentliyinin (İZİA) idarəçiliyində olan sənaye zonalarında investisiya portfeli 307 milyon manatdan çox olan 18 sahibkarlıq subyektinə rezidentlik, 3 sahibkara isə qeyri-rezidentlik statusu verilib.

İZİA-dan Operativ Media-ya bildirilib ki, bunlardan 3-ü Ağdam Sənaye Parkının, 5-i Araz Vadisi İqtisadi Zonası Sənaye Parkının, 3-ü Sumqayıt Kimya Sənaye Parkının, 5-i Hacıqabul Sənaye Parkının, 1-i Masallı Sənaye Məhəlləsinin, 1-i Sabirabad Sənaye Məhəlləsinin rezidenti kimi qeydiyyata alınıb.

Eyni zamanda, Ağdam, Hacıqabul və Araz Vadisi İqtisadi Zonası sənaye parklarında hər bir zona üzrə 1 olmaqla ümumilikdə 3 sahibkarlıq subyektinə isə qeyri-rezidentlik statusu verilib.

Qeydiyyatdan keçən investorlar tərəfindən sənaye zonalarında smart televizorlar, velosiped, elektrik mühərrikli avtobuslar, lift və eskalatorlar istehsalı layihələri həyata keçiriləcək, tekstil sahəsində klasterləşmə formalaşdırılacaq, günəş elektrik stansiyası qurulacaq.