Rumıniya Avropa güzəştli kredit proqramı (SAFE) çərçivəsində "Airbus" şirkətindən helikopterlərin, "Thales"dən isə radarların tədarükünə dair ümumi dəyəri bir milyard avronu ötən iki müqavilə imzalayıb.

​Operativ Media xəbər verir ki, bu barədə ölkənin müdafiə naziri vəzifəsini icra edən Radu Mirutse keçirdiyi mətbuat konfransında məlumat verib. "Agerpres" agentliyinin yaydığı xəbərə görə, nazir layihə çərçivəsində qalan müqavilələrin də imzalandığını və bura 12 ədəd "Airbus" helikopteri ilə eyni sayda "Thales" radarının daxil olduğunu vurğulayıb.

​Maliyyə şərtlərinə əsasən, helikopterlərin alınması üçün 852 milyon avro, radarlar üçün isə 258 milyon avro vəsait ayrılıb. Hərbi idarənin rəhbəri indiyədək SAFE proqramı çərçivəsində bağlanmış sazişlərin ümumi məbləğinin 7,5 milyard avroya çatdığını diqqətə çatdırıb.

​Müdafiə Nazirliyi xətti ilə ümumilikdə 8,33 milyard avro həcmində investisiya nəzərdə tutan proqram çərçivəsində 2030-cu ilə qədər digər müqavilələrin də imzalanması planlaşdırılır. Bu satınalmalara Ukrayna ilə birgə 200 milyon avro dəyərində pilotsuz uçuş aparatlarının istehsalı layihəsi də daxildir.

​Hərbi qurumun məlumatına görə, SAFE çərçivəsində əldə olunacaq bütün hərbi texnikanın təxminən yarısı tədarük ediləcək.