Amerika Birləşmiş Ştatları İrana qarşı hərbi əməliyyatların miqyasının kəskin şəkildə genişlənməsi ehtimalını nəzərə alaraq, İsrailə onlarla əlavə hərbi yanacaqdoldurma təyyarəsi göndərir.

​Operativ Media xəbər verir ki, bu barədə "Axios" portalı məlumat yayıb. Adları açıqlanmayan Amerika və İsrail rəsmilərinə istinadən qeyd olunub ki, ABŞ prezidenti Donald Tramp İrana qarşı zərbələrin əhəmiyyətli dərəcədə eskalasiyası variantını nəzərdən keçirir.

​Planların bir hissəsinin çərşənbə axşamı Pentaqon tərəfindən dövlət başçısına təqdim olunduğu bildirilir. İddialara görə, İranın elektrik stansiyaları kimi mühüm infrastruktur obyektlərinin bombalanması və nüvə obyektlərinə yeni zərbələrin endirilməsi variantları araşdırılır. Nəşrin məlumatına görə, Amerika lideri hələ yekun qərar qəbul etməsə də, onun "yaxın günlərdə eskalasiyaya" gedə biləcəyi təəssüratı yaranır.

​Nəşrdə dəqiqləşdirilir ki, hazırda Tel-Əviv yaxınlığındakı Ben-Qurion hava limanında 30-a yaxın, Ramon hava limanında isə təxminən eyni sayda ABŞ yanacaqdoldurma təyyarəsi var. İsrail rəsmilərinin sözlərinə görə, ABŞ yaxın günlərdə bu təyyarələrin ümumi sayını "müharibənin əvvəlində müşahidə olunan səviyyəyə" çatdırmaq üçün "daha bir neçə onlarla yanacaqdoldurma təyyarəsi" yerləşdirmək istəyir. Vurğulanır ki, ABŞ təyyarələrinin Ben-Qurion hava limanının fəaliyyətinə faktiki olaraq mane olması bu məsələni İsraildə kifayət qədər kəskinləşdirib.

​İyulun 14-də İsrailin nəqliyyat naziri Miri Regev kommersiya reyslərinin ləğv edilməsinin qarşısını almaq məqsədilə əlavə Amerika yanacaqdoldurma təyyarələrinin Ben-Qurion hava limanına enişinə icazə verilməməsi barədə sərəncam imzalayıb.

​Məqalədə həmçinin ABŞ administrasiyasının əlavə yanacaqdoldurma təyyarələrinin qəbul edilməsi üçün İsrail hökumətinə müraciət etdiyi, yekun qərarın isə İsrailin baş naziri Benyamin Netanyahudan asılı olduğu vurğulanır.