Fərhad Hacıyev: Analitik təhlil mərhələsinin iştirakçılarından 123 nəfər apellyasiyaya müraciət edib

"Yüksəliş” müsabiqəsinin Analitik təhlil mərhələsində iştirak edən 7256 iştirakçıdan 123 nəfər apellyasiyaya müraciət edib. Müraciətlər əsassız olduğu üçün heç biri qəbul edilməyib. 

Operativ Media xəbər verir ki, bunu gənclər və idman nazirinin müavini, “Yüksəliş” müsabiqəsinin İşçi Qrupunun rəhbəri Fərhad Hacıyev deyib. 

O bildirib ki, Analitik təhlil mərhələsində uğurla iştirak edən 1478 namizəd əyani mərhələnin son turu olan İdarəetmə bacarıqları imtahanında iştirak hüququ qazanıb: “Yüksəliş” müsabiqəsi qara qızılın insan kapitalına çevrilməsi istiqamətində atılmış əsas addımlardan biridir. Bu müsabiqə innovativ yanaşmalara əsaslanan, şəffaf və obyektiv seçim mexanizmi ilə ölkənin kadr bankının formalaşdırılmasına xidmət edən strateji addımdır”. 

Xatırladaq ki, “Yüksəliş” müsabiqəsi Prezident İlham Əliyevin 2019-cu il iyulun 26-da imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub. Prezident İlham Əliyev 2024-cü il dekabrın 18-də beşinci “Yüksəliş” müsabiqəsinin keçirilməsi ilə bağlı Sərəncam imzalayıb.