Elan saytlarında saxta məlumatlar yerləşdirərək vətəndaşlara qarşı dələduzluq edən şəxs tutulub

Səbail Rayon Polis İdarəsinin 41-ci Polis Bölməsi əməkdaşlarının keçirdikləri tədbir nəticəsində elan saytlarında saxta məlumatlar yerləşdirərək çoxsaylı vətəndaşlardan müxtəlif məbləğlərdə pul vəsaitlərini “beh” adı ilə dələduzluq yolu ilə ələ keçirdiyinə görə saxlanılan Elman Həsənovun digər analoji əməllərinin də üstü açılıb.
   
DİN mətbuat xidmətindən "Operativ Media"ya verilən məlumata görə, araşdırmalarla onun müxtəlif vaxtlarda daha 4 nəfər şəxsin eyni üsulla 2075, 400 və 3250 manat olmaqla ümumilikdə 5725 manat pullarını dələduzluq yolu ilə hesabına ödətdirməsi də müəyyən olunub. 

Faktlarla bağlı araşdırmalar davam etdirilir. 

E.Həsənovun qanunsuz əməllərindən zərər çəkən başqa şəxslər varsa bu barədə polisə müraciət edə bilərlər.