"Qalatasaray"ın argentinalı hücumçusu Mauro İkardi komandanı tərk edə bilər.

"Operativ Media" italiyalı jurnalist Di Marzioya istinadən xəbər verir ki, "sarı-qırmızılı" klubun idman direktoru Erden Timurun istefasından sonra Mauro İkardi də komandadan getmək barədə düşünür. 

Xəbərdə Mauro İkardini "Qalatasaray"a gəlməyə razı salan detalın Erden Timurun layihəsi olduğu bildirilib.

Hətta İkardinin Erden Timura verdiyi ikinci çempionluq vədini tutmaq üçün Səudiyyə Ərəbistanından gələn astronomik təklifləri rədd etdiyi vurğulanıb.

Superliqada mövsümü bombardir kimi başa vuran İkardi bütün yarışlar daxil 47 matça çıxıb. 32 qol vurub və 12 məhsuldar ötürmə statistikasına imza atıb.