Azərbaycan BMT-Turizmin Avropa üzrə Regional Komissiyasının 72-ci iclasında təmsil olunub

12-14 may 2026-cı il tarixlərində Azərbaycan nümayəndə heyəti Maltada keçirilmiş BMT-Turizmin Avropa üzrə Regional Komissiyasının 72-ci iclasında iştirak edib.

Bu barədə Operativ Media-ya Dövlət Turizm Agentliyindən məlumat verilib.

Bildirilib ki, iclasda davamlı və dayanıqlı turizmin təşviqi məqsədilə 2027-ci ilin “Beynəlxalq Dayanıqlı Turizm İli” elan olunması ilə bağlı fikir mübadiləsi aparılıb.

İclas çərçivəsində BMT-Turizmin Baş katibi xanım Şeyxa Nasir Əl Nuvais tərəfindən “Qlobal baxış və regional yanaşma” mövzusunda hesabat təqdim olunub və Monteneqronun 2027-ci ildə BMT-Turizmin Avropa üzrə Regional Komissiyasının növbəti 73-cü iclasına ev sahibliyi etməsi haqqında qərar qəbul edilib.

Tədbir çərçivəsində, həmçinin “Arzuladığımız Gələcəyə Doğru Turizmin İnkişafı: İnkişaf, İnsan və Planet Arasında Balansın Qurulmasına dair Siyasətlər üzrə Dialoq” adlı tematik konfrans təşkil edilib, turizmdə dayanıqlı inkişaf, yerli icmaların rifahı və ekoloji tarazlığın qorunması istiqamətində dövlət siyasətlərinin rolu müzakirə olunub.