“Sənaye 4.0 Hazırlıq” Proqramı çərçivəsində yerli müəssisələrlə görüşlər keçirilib

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) tərəfindən icra olunan “Sənaye 4.0 Hazırlıq” Proqramı çərçivəsində proqrama müraciət etmiş “Konstralab Industries” və “Azertexnolayn” MMC şirkətlərinin rəhbərləri ilə görüşlər keçirilib.

Operativ Media xəbər verir ki, “Konstralab Industries” şirkətinin təsisçisi Orxan Quluzadə ilə keçirilən görüşdə şirkətin Goranboy rayonunun Qazanbulaq kəndində yerləşən gips-karton, astar və üzlük gips məhsulları istehsal edən tikinti materialları zavodunun “Sənaye 4.0 Hazırlıq” Proqramına cəlb olunması müzakirə olunub.

“Azertexnolayn” MMC-nin direktoru Vüqar İzzətli ilə görüşdə ilkin mərhələdə şirkətin Sumqayıt Sənaye Parkında yerləşən Polad Boru Zavodunun proqrama cəlb olunacağı qeyd edilib. Bildirilib ki, “Azertexnolayn” MMC-nin Sumqayıt Sənaye Parkında üç istehsal müəssisəsi fəaliyyət göstərir. Gələcəkdə digər müəssisələrin də bu proqramdan yararlanması imkanı qeyd olunub.

Görüşlərdə müəssisələrin texnoloji vəziyyətinin ilkin qiymətləndirilməsi, texnoloji transformasiya potensialının müəyyənləşdirilməsi və proqram çərçivəsində həyata keçiriləcək diaqnostika prosesinə hazırlıq məsələləri müzakirə olunub.

“Sənaye 4.0 Hazırlıq” Proqramı İqtisadiyyat Nazirliyinin dəstəyi ilə həyata keçirilir və yerli sənaye müəssisələrinin texnoloji transformasiyasını sürətləndirməyi, əməliyyat səmərəliliyini artırmağı və innovasiyalar vasitəsilə onların rəqabət qabiliyyətini gücləndirməyi hədəfləyir.

Proqram çərçivəsində istehsal yönümlü və ixrac potensialı yüksək olan müəssisələrin texnoloji yetkinlik səviyyəsi beynəlxalq metodologiya əsasında qiymətləndirilir. Müstəqil ekspertlər tərəfindən aparılan bu diaqnostikanın nəticəsində şirkətlər texnoloji transformasiya üçün fərdi yol xəritəsi əldə edir. Yol xəritələrinin icrası mərhələsində müəssisələrə Azərbaycan Biznesinin İnkişafı Fondu (ABİF) tərəfindən güzəştli kreditlərin verilməsi və beynəlxalq mütəxəssislərin iştirakı ilə ekspertiza dəstəyinin göstərilməsi nəzərdə tutulur.

2024-cü ildə proqramın pilot mərhələsi uğurla yekunlaşıb və bu müddətdə “Metak”, “Azerfloat” və “STP Global Cable” şirkətlərinin texnoloji transformasiyasına dəstək göstərilib.

Proqrama qoşulmaq istəyən şirkətlər industry4.az platforması üzərindən qeydiyyatdan keçə bilərlər. İştirak tamamilə ödənişsizdir.