Daha bir neçə vətəndaş "Whatsapp" üzərindən dələduzluq qurbanı olub - FOTO

Azərbaycanda "Whatsapp" üzərindən dələduzluq halları artıb.

"Operativ Media" xəbər verir ki, dələduzlar kontaktınızda olan şəxslərin profilləri üzərindən sizə mesaj yaza və sizdən pul istəyə bilərlər.

Zərərçəkmiş S.Ş bildirib ki, ötən gün kontaktında olan şəxs tərəfindən ondan pul istənilib. S.Ş pulu həmin şəxsin ad soyadının da qeyd olunduğu bank kartına göndərib. Daha sonra məlum olub ki, həmin şəxsin "Whatsapp" profilindən istifadə edərək daha bir neçə şəxsə qarşı dələduzluq edilib.

Məsələ ilə bağlı açıqlama verən təhlükəsizlik eksperti Rəşad Rza bildirib ki, bu hallar daha da artıb:

“Son zamanlar təəssüflər olsun ki, dələduzluq halları artır. Ölkəmizdə bu hallar yeni başlasa da, dünyada uzun illərdir bəzi şəxslər bu tipli dələduzluq fəaliyyəti ilə məşğul olur. İlk olaraq vətəndaş diqqətli olmalıdır. O, telefonuna yüklədiyi proqramların doğru və təhlükəsiz olduğuna əmin olmalıdır.  Dəfələrlə bildirilib ki, atılan bütün linklərə daxil olmaq olmaz. Dələduzlar müxtəlif linklər vasitəsilə vətəndaşın şəxsi məlumatlarını oğurlayaq onun sosial şəbəkələrini ələ keçirə bilir. Ona görə də vətəndaş linkləri dəqiqləşdirdikdən sonra daxil olmalıdır. Eyni zamanda pul köçürməsi zamanı həmin şəxslə əlaqa saxlamaq daha məqsədəuyğundur”.