"Qarabağ" futbol klubunun prezidenti Tahir Gözəl ötən mövsümdəki uğurları təkrarlamaq niyyətində olduqlarını və komandanın heyətində aparılan yeniliklərin böyük nəticələr vəd etdiyini bəyan edib.

​Operativ Media xəbər verir ki, klub rəhbəri yeni mövsüm öncəsi heyətdə ciddi dəyişikliklərin baş verdiyini bildirib. Onun sözlərinə görə, bəzi futbolçularla yollar ayrılıb və onların əvəzinə yeni oyunçular transfer olunub. T.Gözəl vurğulayıb ki, komandanı yeniləmək zəruri addım idi və hazırkı heyət keyfiyyət baxımından əvvəlki mövsümlə müqayisədə daha üstündür.

​Bununla yanaşı, klub prezidenti əsas çətinliyin yeni transferlərin oyun sisteminə uyğunlaşması üçün vaxt azlığı ilə bağlı olduğunu qeyd edib. O, bu addımın müəyyən risklər daşımasına baxmayaraq, böyük uğurlar gətirəcəyinə inandığını ifadə edib.

​Ötən mövsümün xüsusi önəm kəsb etdiyini xatırladan T.Gözəl hər mövsümün yeni çağırışlar gətirdiyini və keçmiş nəticələrin zəmanət olmadığını diqqətə çatdırıb. O, komandanın əsas məqsədinin yenidən maksimum nəticə göstərmək olduğunu və bu istiqamətdə bütün imkanların səfərbər ediləcəyini vurğulayıb.