Si Cinpin: Çin və ABŞ arasında qarşıdurma qarşılıqlı ziyana səbəb olacaq

Çin və ABŞ arasındakı qarşıdurma hər iki tərəfə zərər verəcək, buna görə də tərəflər rəqib deyil, tərəfdaş olmalıdırlar.

Operativ Media xəbər verir ki, bu fikirləri Çin Xalq Respublikasının Sədri Si Cinpin ABŞ prezidenti Donald Tramp ilə görüşündə bildirib. Görüş "Fox News" telekanalı vasitəsilə canlı yayımlanıb.

"Ölkələrimiz arasındakı qarşıdurma qarşılıqlı ziyana səbəb olacaq, bu səbəbdən biz rəqib deyil, tərəfdaş olmalıyıq", – deyə Si Cinpin vurğulayıb. ÇXR Sədri dəqiqləşdirib ki, qarşılıqlı dəstək və ümumi rifah Pekin və Vaşinqtona yeni dövrdə iki böyük dövlət arasında qarşılıqlı fəaliyyətə dair yeni yanaşma hazırlamağa imkan verəcək. O, həmçinin hər iki ölkəni və bütün dünyanı maraqlandıran mühüm məsələlər ətrafında fikir mübadiləsi aparmağı səbirsizliklə gözlədiyini təsdiqləyib.

Donald Trampın Çinə səfəri mayın 15-i də daxil olmaqla davam edəcək. Səfərin məqsədi ticari-iqtisadi əməkdaşlıq və ikitərəfli gündəliyin digər mühüm bəndləri üzrə fikir ayrılıqlarını yumşaltmaq və aradan qaldırmaq, qlobal problemlər, o cümlədən ABŞ və İran arasındakı münaqişə ilə bağlı mövqeləri əlaqələndirməkdir. Tərəflərin, həmçinin "vahid Çin" prinsipi çərçivəsində Pekinin müstəsna daxili siyasətinə aid olan Tayvan məsələsinə də toxunacağı gözlənilir.