Paşinyan: Yeni konstitusiyada Müstəqillik Bəyannaməsinə istinad olmayacaq

"Yeni təklif olunan Konstitusiyada hazırkı Konstitusiyadan fərqli olaraq Müstəqillik Bəyannaməsinə istinad olmayacaq".

Operativ Media xəbər verir ki, bunu Ermənistanın Baş naziri Nikol Paşinyan bildirib.

“Bilirəm ki, bu məsələ ilə bağlı bir çox müzakirələr gedir, xüsusən də yeni Konstitusiyanın mətnində Ermənistan Respublikasının İstiqlal Bəyannaməsinə istinad olub-olmaması ilə bağlı. Mən bu məsələ ilə bağlı mövqeyimi açıq şəkildə bildirmişəm və demişəm ki, yeni Konstitusiyada İstiqlal Bəyannaməsinə istinad olmamalıdır. Bəs bunun arxasında duran səbəb nədir? Çox sadədir. Əgər bu gün yeni bir Konstitusiya qəbul etsək və onun preambulasında Müstəqillik Bəyannaməsinə istinad varsa, bu, Qarabağ hərəkatını davam etdirdiyimiz anlamına gələcək.

Əgər Qarabağ hərəkatını davam etdirsək, bu, Azərbaycanla münaqişəni yenidən başlatdığımız anlamına gələcək və əgər Azərbaycanla münaqişəni yenidən başlatsaq, bu, sülhün mümkün olmayacağı anlamına gələcək", - o, qeyd edib.