Nicat İmanov: “Dövlət-özəl tərəfdaşlığı çərçivəsində həyata keçirilən layihələrə 30 il müddətinə vergi güzəştləri tətbiq ediləcək”

"Operativ Media" xəbər verir ki, bu barədə İqtisadiyyat Nazirliyi yanında Dövlət Vergi Xidmətinin Vergi siyasəti Baş İdarəsinin rəisi Nicat İmanov bildirib.

O, ölkə başçısı tərəfindən 2022-2026-cı illər üzrə sosial iqtisadi inkişaf strategiyasının təsdiq edildiyini xatırladıb. İdarə rəisinin sözlərinə görə, həmin strategiyada Dövlət Vergi Xidməti qarşısında - yəni vergi orqanları qarşısında iki strateji hədəf müəyyən edilib:

"Bu strateji hədəflərdən birincisi iqtisadiyyatın prioritet sahələrinə investisiyaların cəlb edilməsi idi. İkinci istiqamət isə kölgə iqtisadiyyatının daraldılması və bu sahədə rəqəmsallaşmanın genişləndirilməsi idi. Əlbəttə ki, birinci istiqamət üzrə, yəni investisiyaların cəlbediciliyinin artırılması, sahibkarlar üçün vergi yükünün aşağı salınması bu kontekstdə önəmli idi və cari il üçün həyata keçirilmiş vergi qanunvericiliyindəki dəyişikliklər məhz dövlət-özəl tərəfdaşlığını, yerli avtomobil sənayesinin inkişafını, gəmi təmiri ilə bağlı məsələləri, dəmir yollarının inkişafı ilə bağlı vergi dəstəklərini əhatə edir. Yəni bunlar məhz investisiyanın cəlbediciliyinin artırılması baxımından önəmlidir".

N.İmanov vurğulayıb ki, beləliklə, dövlət-özəl tərəfdaşlığına böyük həcmli vergi güzəştlərinin verilməsi nəzərdə tutulur. Onun sözlərinə görə, dövlət-özəl tərəfdaşlıq layihələrinin dəyəri minimum 30 milyon manatdır: "Yəni 30 milyon manat üzərində olan layihələr böyük investisiya tələb edir. Təbii ki, böyük investisiya həm də paralel olaraq məşğulluq yaradır, bu proseslərin icrasını həyata keçirən podratçı və subpodratçı şirkətlərin aktivliyini artırır. Bu baxımdan dövlət-özəl tərəfdaşlığı çərçivəsində həyata keçirilən layihələrə 30 il müddətinə vergi güzəştləri tətbiq ediləcək".

DVX rəsmisi qeyd olunan güzəştlər barədə ətraflı məlumat verib. O bildirib ki, bu güzəştlər məhz birbaşa vergilər - yəni mənfəət vergisini, gəlir vergisini, əmlak vergisini və torpaq vergisini tam həcmdə azad edir: "Eyni zamanda, bu investisiyaların qoyuluşu ilə bağlı əsas vəsaitlərin və fondların idxalı da əlavə dəyər vergisindən və rüsumlardan tamamilə azad edilir. Bu güzəştlər alternativ enerjilərin istehsalı layihələrinə münasibətdə də tətbiq edilir. Daha sonra investisiyaların cəlbediciliyini artırmaq üçün yerli avtomobil sənayesində minik avtomobillərin istehsalı əlavə dəyər vergisindən azad edilmişdir. Paralel olaraq avtobusların istehsalının da əlavə dəyər vergisindən azad edilməsini nəzərdə tutulur. Yəni istehsalçı tərəfindən istehsal edilən avtobusların satışı əlavə dəyər vergisindən azad edilir. Eyni zamanda, bu istehsal prosesi ilə bağlı idxal olunan xammal materialları, yəni o avtobusun ehtiyat hissələrinin idxalı əlavə dəyər vergisindən, rüsumlardan azad edilir".