İranın xarici işlər naziri Seyyid Abbas Əraqçi Pakistanın baş nazir müavini və xarici işlər naziri Məhəmməd İshaq Dar ilə telefon danışığı aparıb.

Operativ Media xəbər verir ki, görüş zamanı Əraqçi Pakistanın diplomatik prosesdəki təşəbbüslərini və razılaşma memorandumuna (MoU) doğru aparılan səyləri yüksək qiymətləndirib. 

O, ABŞ-nin bölgədəki münaqişələrin, o cümlədən Livandakı gərginliyin sona çatdırılmasına dair öhdəliklərinə diqqət çəkərək, hər hansı pozuntunun Vaşinqtonun məsuliyyəti olacağını bildirib.

Pakistan tərəfi isə davam edən diplomatik prosesləri dəstəklədiyini, dialoqun davam etdirilməsinin və müsbət nəticələrin əldə olunmasının vacibliyini vurğulayıb.

Tərəflər həmçinin ikitərəfli məsələləri müzakirə edərək, məsləhətləşmələrin və əlaqələrin davam etdirilməsinə razılaşıblar.