“Mançester Siti”nin iki oyununun vaxtı dəyişə bilər – Premyer Liqa ilə danışıqlar gedir

"Mançester Siti" Premyer Liqa rəhbərliyi ilə çempionluq mübarizəsində həlledici rol oynaya biləcək iki oyunun vaxtının dəyişdirilməsi barədə danışıqlar aparır.

Operativ Media xəbər verir ki, bu haqda BBC məlumat yayıb.

Mənbə bildirir ki, Xosep Qvardiolanın komandasının mayın 17-nə planlaşdırılan "Bornmut"la səfər oyunu, "şəhərlilər"in bu tarixdən cəmi 24 saat əvvəl keçiriləcək İngiltərə Kubokunun finalına vəsiqə qazanması səbəbindən təxirə salınacaq. "Kristal Pelas"a qarşı keçirilməli olan ev oyununun dəqiq tarixi isə hələ də təsdiqlənməyib. Hazırda maraqlı tərəf olan üç klub Premyer Liqa ilə oyunların yeni tarixləri barədə dialoq aparır.

Təklif olunan variantlardan birinə görə, "Siti" – "Kristal Pelas" matçı mayın 13-də, "Bornmut"la səfər qarşılaşması isə mayın 19-da baş tuta bilər. Bu halda "Bornmut"la oyun mayın 16-da "Çelsi"yə qarşı keçiriləcək kubok finalı ilə mövsümün son turundakı "Aston Villa" (24 may) matçı arasına düşəcək. Belə bir ssenari "Siti"nin mövsümün son həftəsindən əvvəl yeddi gün ərzində üç oyun keçirməsi deməkdir ki, klub rəhbərliyi hazırda alternativ variantları nəzərdən keçirir.

Digər təklifə əsasən, "Bornmut"la oyunun mayın 12-də, "Pelas"la matçın isə mayın 19-da keçirilməsi mümkündür. Bu variant komandaya finaldan əvvəl bərpa üçün əlavə vaxt qazandıracaq və çempionatın son iki oyununu evdə keçirməyə imkan verəcək. UEFA-nın təqvimi ilə üst-üstə düşməməsi üçün bəzi tarixlər əlçatmaz olsa da, yaxın vaxtlarda yekun qərarın açıqlanacağı gözlənilir. 22 ildən sonra ilk çempionluğunu hədəfləyən "Arsenal" da bu qərarı diqqətlə izləyir.

Hazırda turnir cədvəlinə 34 oyundan sonra 73 xalla "Arsenal" başçılıq edir. "Mançester Siti" 33 oyundan 70 xalla ikinci, "Mançester Yunayted" isə 34 oyundan 61 xalla üçüncü pillədə qərarlaşıb.