Xavi Simons ağır zədə səbəbindən DÇ-2026-nı buraxacaq

"Tottenhem"in və Niderland millisinin yarımmüdafiəçisi Xavi Simons ciddi zədə aldığını və bu səbəbdən 2026-cı il Dünya Çempionatının final mərhələsini buraxacağını bildirib.

Operativ Media xəbər verir ki, bu haqda 23 yaşlı futbolçu sosial şəbəkədə paylaşım edib.

"Deyirlər ki, həyat bəzən amansız olur və bu gün mən bunu hiss edirəm. Mövsümüm qəfildən başa çatdı, sadəcə baş verənləri anlamağa çalışıram. Düzünü desəm, qəlbim parça-parçadır. Bunların heç bir mənası yoxdur. Tək istədiyim komandam üçün döyüşmək idi, lakin indi bu imkan Dünya Çempionatına getmək şansı ilə birlikdə əlimdən alındı. Bu yay ölkəmi təmsil etmək fürsəti sadəcə boşa çıxdı. Bununla barışmaq üçün vaxt lazım olacaq, lakin mən əlimdən gələn ən yaxşı komanda yoldaşı olmağa davam edəcəyəm. Şübhə etmirəm ki, biz birlikdə bu mübarizədə qalib gələcəyik. Meydana qayıdacağım günləri sayaraq inam, güc və əzmlə bu yolu keçəcəyəm. Mənə qarşı səbirli olun".

Simons İngiltərə çempionatının 34-cü turunda "Vulverhempton"la oyunda (1:0) dizinin ön çarpaz bağlarından zədə alıb. O, matçın 63-cü dəqiqəsində xərəklə meydandan çıxarılıb.

2025/26 mövsümündə Simons "Tottenhem" və "Leypsiq"in heyətində keçirdiyi 43 oyunda 6 qol vurub və 7 məhsuldar ötürmə edib. Niderland millisinin tərkibində isə o, 34 matçda 6 qol və 5 ötürmə ilə yadda qalıb.