"Real Madrid"in müdafiəçisi zədəsini tam sağaldıb
"Real Madrid"in müdafiəçisi Dani Karvaxal son matçlarda dizində heç bir problem yaşamır və özünü fiziki cəhətdən tam sağlam hiss edir.
Operativ Media xəbər verir ki, bu haqda AS nəşri mənbələrə istinadən məlumat yayıb.
2025/26 mövsümünün əvvəlində dizindəki daimi diskomfort 34 yaşlı futbolçunun oyun ritmini pozmuşdu. İlk cərrahi müdaxilə problemi tam həll etmədiyi üçün o, ikinci dəfə əməliyyat olunmaq məcburiyyətində qalmışdı.
Mənbə qeyd edir ki, həmin vaxt Karvaxal kritik seçim qarşısında idi. O, ağrılarla mühafizəkar üsullarla mübarizə aparmaq əvəzinə, daha tez sağalıb mövsümün ən həlledici mərhələsində komandasına kömək etmək üçün yenidən əməliyyat olunmağa qərar verdi.
Karvaxal 2025/26 mövsümündə meydana çıxdığı 19 matçda məhsuldar göstəricilərlə yadda qalmayıb. Onun "Real Madrid"lə olan müqaviləsi 30 iyun 2026-cı il tarixinədək qüvvədədir.
