Ərdoğan Özbəkistana gedir
Türkiyə prezidenti Rəcəb Tayyib Ərdoğan noyabrın 8-9-da Özbəkistanda keçiriləcək İqtisadi Əməkdaşlıq Təşkilatının sammitində iştirak etmək üçün paytaxt Daşkəndə səfər edəcək.
"Operativ Media" xəbər verir ki, "Yeni Şafak"ın məlumatına görə, Ərdoğan Zirvə toplantısında İsrailin Fələstinə hücumlarının dayandırılması və Fələstinə humanitar yardımın sürətlə köçürülməsi məsələsini də müzakirə edəcək.
Qeyd edək ki, bu il sammit 16-cı dəfə təşkil olunacaq, iki gün davam edəcək.
Bildirilir ki, sammitdə iştirakçı ölkələr arasında ticarət-iqtisadi və mədəni əməkdaşlığın təkmilləşdirilməsi istiqamətində tədbirlər görüləcək. İştirakçı ölkələr arasında ticarəti 100 milyard dollara çatdırmaq üçün İƏT Ticarət Sazişi (ECOTA) və ticarətin asanlaşdırılması strategiyası kimi regional ticarəti yaxşılaşdırmaq üçün alətlər müzakirə olunacaq.
"Görülməli olan tədbirlərə baxılacaq. Regionda nəqliyyat infrastrukturunun inkişafı da liderlərin gündəliyindədir. Müasir İpək Yolunun dirçəldilməsi üzrə əməkdaşlıq qiymətləndiriləcək. Layihələr çərçivəsində inkişaflar “Yaxın Şərq-Qərb Dəhlizi” Transxəzər Təşəbbüsü və Bakı-Tbilisi-Qars dəmir yolu xətti ilə bağlı məsələlər də müzakirə olunacaq”, - deyə məlumatda bildirilir.
Onu da qeyd edək ki, Azərbaycan Prezidenti İlham Əliyevin də Zirvə toplantısında iştirak edəcəyi gözlənilir.
Nərmin Qocamanova
