Tramp İranla gərginliyin iqtisadi təsirlərindən danışıb
ABŞ lideri Donald Tramp İranla münaqişənin nizamlanmaya biləcəyini istisna etməyib.
Operativ Media xəbər verir ki, o, bu fikri aprelin 16-da Las-Veqasda (Nevada ştatı) administrasiyasının vergi sahəsindəki fəaliyyətinə həsr olunmuş tədbirdə çıxışı zamanı səsləndirib.
İranla müharibənin səbəb olduğu enerji daşıyıcılarının qiymət artımından bəhs edən Tramp, neftin qiymətinin bir barel üçün 250-300 dollara qədər qalxacağı ilə bağlı proqnozları xatırladıb.
"Bu gün isə o, 89-90 dollardır. Üstəlik, bu, müharibə dövründədir və biz hələ ki, onu nizamlamamışıq. Ola bilsin ki, heç buna nail olmayacağıq da", — deyə o bildirib.
Bununla belə, ABŞ lideri elə həmin çıxışının əvvəlində münaqişənin heç bir fəsad törətmədən davam etdiyini və kifayət qədər tezliklə başa çatmalı olduğunu qeyd edib.
