İsrail Müdafiə Ordusu ölkənin şimal bölgələrinin təhlükəsizliyini təmin etmək məqsədilə Livanın cənubunda hərbi fəaliyyətini genişləndirir.

Operativ Media xəbər verir ki, bu barədə ordunun mətbuat xidməti məlumat yayıb.

Məlumata görə, ordunun 91-ci diviziyasının rəhbərliyi altında 8-ci briqadanın bölmələri strateji müdafiə mövqelərini möhkəmləndirmək üçün hədəf yönümlü quru əməliyyatlarını icra edir.

Hərbi reydlər zamanı İsrailin şimal yaşayış məntəqələrinə tuşlanmış raket qurğuları, tank əleyhinə mərmilər və müxtəlif növ silah-sursat anbarları aşkar edilib. Qeyd edilib ki, həmin silahlar İran tərəfindən dəstəklənən "Hizbullah" hərəkatı tərəfindən İsrailə qarşı hücum planlarının tərkib hissəsi kimi istifadə olunurdu.