Türkiyə Prezidenti Ağ Evdəki danışıqların nəticələrini səmərəli adlandırıb

İki onillik ərzində Türkiyə hökuməti ölkənin və xalqın mənafeyini qorumaq üçün hər cür səy göstərir. Eyni mövqe Ağ Evdə Türkiyə-Amerika yüksəksəviyyəli danışıqların əsasını təşkil edib.

Operativ Media xəbər verir ki, bu barədə Türkiyə Prezidenti Rəcəb Tayyib Ərdoğan Ankarada hökumətin 3,5 saatlıq iclasından sonra keçirilən brifinqdə bildirib.

Türkiyə lideri ABŞ Prezidenti Donald Trampla danışıqların nəticələrini çox səmərəli və müsbət adlandırıb.

“Sentyabrın 25-də Vaşinqtonda mənim Trampla dostluq şəraitində bir çox məsələləri, o cümlədən birgə ticarət dövriyyəsini ildə 100 milyard dollara çatdırmaq səylərini müzakirə etmək imkanım oldu”, - deyə o, bildirib. Türkiyə lideri Rusiya-Ukrayna müharibəsi və Yaxın Şərqdəki vəziyyətin Ağ Evin gündəmində əsas yer tutduğunu qeyd edib.

Türkiyə Prezidenti Ağ Evin rəhbəri ilə görüşün müsbət nəticələrinin qarşıdakı dövrdə hiss olunacağına əmin olduğunu bildirib.