"AlfaSığorta" AZAL-ın qəzaya uğramış təyyarəsində həlak olanların və yaralananların ailələrinə sığorta ödənişi həyata keçirir

Rusiyanın "AlfaSığorta" şirkəti Qazaxıstanın Aktau şəhəri yaxınlığında "Azərbaycan Hava Yolları" QSC-nin (AZAL) “Embraer 190” markalı sərnişin təyyarəsinin qəzaya uğraması nəticəsində ölən və yaralananlar üçün daşıyıcının məsuliyyət sığortası üzrə sərnişinlərə dəymiş zərər və sığorta ödənişlərini hesablayır.

Operativ Media xəbər verir ki, bu barədə "İnterfaks"a "AlfaSığorta"nın baş direktorunun aviasiya və kosmik sığorta üzrə müavini İlya Kabaçnik məlumat verib. 

"Bakı-Qroznı reysi ilə bağlı AZAL sərnişin daşımaları həm Azərbaycanın, həm də Rusiyanın tərəfdar çıxdığı 1999-cu il beynəlxalq Monreal Konvensiyası ilə tənzimlənir. "AlfaSığorta" ilə AZAL arasında bağlanmış müqavilə Rusiyaya həyata keçirilən uçuşlarla bağlı riskləri əhatə etdiyi üçün ödənişlər həmçinin Rusiyanın 67-FZ saylı mülki məsuliyyətin icbari sığortası (OSGOP) haqqında qanuna uyğun olaraq nəzərdə tutulur”, - məlumatda bildirilib.

Onun sözlərinə görə, bu qanunla həyat və sağlamlığa dəyən zərərə görə ödənişlərin həddi 2 milyon rubl (hazırkı məzənnə ilə 22,4 min dollar) müəyyən edilib. Təqdim edilmiş sənədlər paketi əsasında ödənişlərin özləri də tez həyata keçirilə bilər.

Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsindəki 67 nəfərdən 38-i həlak olub, 29-u sağ qalıb. İlkin məlumatlara görə, təyyarə Rusiyanın Qroznı üzərindəki hava məkanında baş verən fiziki və texniki xarici müdaxilə nəticəsində qəzaya uğrayıb.