Nicat İmanov: Vergidən yayınma hallarının qarşısını almaq üçün dövlət və biznes birlikdə işləyir

"Yeni iqtisadi inkişaf modelində dövlət və özəl tərəfdaşlığın əhəmiyyəti olduqca vacib bir məsələdir".

Operativ Media xəbər verir ki, bunu Dövlət Vergi Xidmətinin Vergi siyasəti baş idarəsinin rəisi Nicat İmanov deyib.

O qeyd edib ki, dövlət-biznes tərəfdaşlığı dayanıqlı inkişafın açarıdır: "Bildiyiniz kimi, vergi siyasəti fiskal siyasəti təmin edir və büdcə gəlirlərini təmin etməklə yanaşı kölgə iqtisadiyyatı ilə mübarizə çərçivəsində tədbirlər həyata keçirir. Bununla belə, vergi siyasəti eyni zamanda iqtisadi hədəflərə söykənən, dövlətin iqtisadi siyasətində biznesin inkişafını dəstəkləyən alət kimi çıxış edir. Vergi siyasəti vergi təşviq alətləri ilə biznesi dəstəkləyir, vətəndaş cəmiyyətinin sosial müdafiəsini gücləndirir və əhalinin pul gəlirlərinin artırılmasında töhfə verir, eyni zamanda dayanıqlı inkişafa və ekoloji siyasətə dəstək göstərir".

N.İmanov söyləyib ki, vergi siyasətinin həyata keçirilməsində biznesin iştirakı əhəmiyyətlidir və effektli vergi siyasəti üçün dövlət və biznes arasında qarşılıqlı anlaşma vacibdir:

"Vergidən yayınma hallarının qarşısını almaq üçün dövlət və biznes birlikdə işləyir və bu mənada biznes subyektləri dövlət qurumları qarşısında müvafiq təkliflərlə çıxış edir və yeni qaydada dövlət qurumları və biznes cəmiyyəti də bu münasibətdə fikirlərini mübadilə edirlər. Əlbəttə ki, bu proseslərin - yəni biznesin iştirakının müxtəlif faydaları vardır və bu faydalardan dövlət və biznes cəmiyyəti üçün ayrılır. Bu mənada dövlət üçün onun faydalarına nəzər yetirsək, proqnozlaşdırıla bilən və davamlı vergi xidmətinin iqtisadi inkişafı dəstəkləyən və vergi siyasətinin qurulmasına töhfələr verir. Kölgə iqtisadiyyatının azalmasında və şəffaflığın artmasında öz müsbət nəticəsini göstərir. Biznes üçün faydalarına nəzər yetirsək isə bu, vergi rejimlərinin daha sabit və əlverişli olmasına imkan yaradır, sahibkarlıq mühiti üçün bərabər rəqabət imkanlarının yaradılmasını təmin edir".