SİF tərəfindən maliyyələşdirilən sahibkarlıq subyektlərinin sayı 75 %-ə yaxın artıb

2024-cü ildə Sahibkarlığın İnkişafı Fondu (SİF) tərəfindən güzəştli kreditlə təmin edilən sahibkarlıq subyektlərinin sayı 5 722-yə çatıb.

Operativ Media xəbər verir ki, bu barədə SİF məlumat yayıb.

Məlumata görə, bu, 2023-cü illə müqayisədə 74,7 % çoxdur.

Hesabat dövründə verilmiş kredit məbləği isə 28 % artaraq 248,1 milyon manata çatıb.

Ötən il Fondun vəsaitinin səmərəli yerləşdirilməsi məqsədilə sənaye (o cümlədən, aqrar emal), kənd təsərrüfatı, logistika, anbar komplekslərinin yaradılması, turizm, balıqçılıq və akvakultura (o cümlədən, akvaponika), yaşıl layihələr, kütləvi informasiya vasitələrinin inkişafı, tibb, təhsil və xidmət layihələri prioritet istiqamətlər kimi müəyyənləşdirilib. Fond tərəfindən verilmiş ümumi güzəştli kredit məbləğinin 53,3 %-i kənd təsərrüfatı məhsullarının istehsalı, 38,1 %-i sənaye məhsullarının istehsalı və emalı (o cümlədən, aqrar emal), 6,1 %-i xidmət, 2,1 %-i turizm və 0,4 %-i isə balıqçılıq və akvakultura sahələrinə yönəldilib.