Bu il Bakıda Azərbaycan və Rumıniya Müştərək Komissiyasının iclası keçiriləcək

Bu il Bakıda Azərbaycan və Rumıniya Hökumətləri arasında Müştərək Komissiyanın 8-ci iclasının keçirilməsi nəzərdə tutulur.

Bu barədə "Operativ Media"ya Əmək və Əhalinin Sosial Müdafiəsi Nazirliyindən bildirilib.

Qeyd edilib ki, əmək və əhalinin sosial müdafiəsi naziri, Müştərək Komissiyanın Azərbaycan tərəfindən həmsədri Sahil Babayevlə ölkəmizdə səfərdə olan Komissiyanın Rumıniya tərəfindən həmsədri, Rumıniyanın energetika naziri Sebastyan-İoan Burdujanın görüşü olub.

Görüşdə bildirilib ki, Azərbaycan və Rumıniyanın strateji tərəfdaşlığa əsaslanan əlaqələri daim inkişaf edir. Bu əlaqələrin ildən-ilə daha da genişləndirilməsi Azərbaycan və Rumıniya Hökumətləri arasında ticarət-iqtisadi əlaqələr və elmi-texniki əməkdaşlıq üzrə Müştərək Komissiyanın fəaliyyətinin başlıca məqsədidir.

S.İ.Burdujanı Komissiyanın Rumıniya tərəfindən həmsədri təyin edilməsi münasibətilə təbrik edən S.Babayev ölkələrimiz arasında müxtəlif sahələri əhatə edən əməkdaşlığın genişləndirilməsi üçün işlərin davam etdiyini bildirib.

Azərbaycan və Rumıniya arasında iqtisadi əlaqələrin inkişaf etməkdə olmasının növbəti göstəricisi kimi, iki ölkə arasında ticarət dövriyyəsində davamlı artım olduğu qeyd edilib.

S.İ.Burdujanı Azərbaycana səfərindən məmnunluğunu və bu səfərlə bağlı xoş təəssüratlarını ifadə edib. Ölkəsinin Azərbaycanla dost münasibətlərini və əməkdaşlığın inkişafına xüsusi önəm verdiklərini deyib.

Görüşdə Azərbaycan və Rumıniya Hökumətləri arasında Müştərək Komissiyanın bu il Bakıda 8-ci iclasının keçirilməsinin nəzərdə tutulduğu qeyd edilib.

Sosial sahədə də əməkdaşlığın genişlənməsi üçün aparılan işlərdən, DOST mərkəzləri modelinin Rumıniyada tətbiqi perspektivlərindən bəhs olunub.