ABŞ, Yaponiya və digər ölkələrdən 17 mindən çox əsgər Filippində təlimlərə başlayıb
ABŞ, Yaponiya və beş digər ölkədən 17 mindən çox əsgər Filippində "Balikatan" təlimlərinə başlayıb.
Operativ Media xəbər verir ki, bu barədə "PNA" məlumat yayıb.
Bildirilib ki, təlimlərə döyüş atəşi təlimləri də daxil olacaq.
"Bu il Filippin, ABŞ və tərəfdaş ölkələrdən - Avstraliya, Kanada, Fransa, Yaponiya və Yeni Zelandiyadan - 17 mindən çox əsgər iştirak edir". - məlumatda qeyd edilib.
Qeyd edilib ki, manevrlər zamanı qoşunlar hava və raketdən müdafiə texnikaları, eləcə də dəniz təhlükəsizliyi üzrə təlim keçəcəklər. ABŞ Dəniz Piyadaları Korpusunun mətbuat xidmətinin məlumatına görə, tərəflər həmçinin sualtı qayıqlara qarşı müharibə, düşmən gəmilərinə qoşunların desant çıxarılması və xilasetmə əməliyyatları aparacaqlar. Bundan əlavə, qoşunlar logistika və humanitar missiyalar üzrə təlim keçəcəklər. Amerika tərəfi təlimləri Filippinin "tarixindəki ən böyük" təlim adlandırıb.
Agentliyin məlumatına görə, daha 13-18 ölkə müşahidəçi qismində iştirak edir; onların konkret siyahısı açıqlanmır. Təlimlər 8 maya qədər davam edəcək.
