Türkiyədə bələdiyyə seçkiləri 2024-cü il martın 31-də keçiriləcək. 

"Operativ Media" xəbər verir ki, bu qərarı Türkiyə Yüksək Seçki Komissiyası verib. Qərar rəsmi hökumət qəzeti "Resmi gazete"də dərc olunub.

Sənəddə deyilir ki, Yüksək Seçki Komissiyası Rəyasət Heyətinin iclasının yekunu üzrə qərar yekdilliklə qəbul edilib. Gələcəkdə Yüksək Seçki Komissiyası rəsmi “seçki təqvimini”, yəni onların hazırlanmasının, keçirilməsinin, namizədlərin qeydə alınmasının, seçki komissiyalarının formalaşdırılmasının bütün mərhələlərini konkret tarixlərlə əlaqələndirərək hazırlayıb dərc edəcək.

Qarşıdan gələn bələdiyyə seçkiləri həm prezident Rəcəb Tayyib Ərdoğanın hakim Ədalət və İnkişaf Partiyası (AKP), həm də müxalifət üçün vacibdir. İstanbul, Ankara, İzmir və ölkənin bir sıra digər böyük şəhərləri müxalifət bələdiyyə sədrləri tərəfindən idarə olunur. AKP bu meqapolisləri geri almaq niyyətindədir. Bundan başqa, hakim dairələr ölkədə maksimum sayda bələdiyyə almağa çalışacaqlar.